UKURI KURABANDANYA KUJA AHABONA KW’IGURISHWA RY’IPARASERA Y’UMUGAMBWE CNDD-FDD      14 Kigarama 2007

Haraheze imisi tubamenyesheje ko iparasera yari yahawe umugambwe CNDD-FDD mu gisagara ca BUJUMBURA, hari muri Ndamukiza 2006, yagurishijwe na Jérémie NGENDAKUMANA, umukuru w’uwo mugambwe yagenywe n’ikoraniro ry’i
NGOZI, ubu yagaragaje icese ko anyonora itunga ryawo.

Inkuru dukura mu bereye NGENDAKUMANA, zivuga ko ishavu riniga kubera umukuru w’igihugu NKURUNZIZA aherutse kumukura amata mu kanwa mu kubuza ko iyo parasera bayubakamwo kumvo zuko yagurishijwe mu makosa, kandi ari iy’umugambwe.

Nico gituma Jéremie NGENDAKUMANA n’umurwizatunga twari twavuze ko yayigurishijeko ariwe Constatin NDIKUMANA avuka i GITEGA, batanguye kumwambika ibara no kumwararaza ngo yivanze mubitamuraba. Aho bafise
ubwoba ko bazosubiza amafaranga bariye kur’iyo parasera yaguzwe vy’ukuri n’umunya kenya yitwa KARIUKI, asanzwe arongoye ishirahamwe idandaza ibitoro
ryitwa DALBT. Abasanzwe barakurikiramye ibintu uko vyagenze, iyo DALBT ni yo icegera ca kabiri c’umukuru w’igihugu Gabriel NTISEZERANA yari yashinze ko ikorera mu ngata INTERPETROL mu gikorwa co kuzana igitoro mu BURUNDI, kuva aho igiriye ingorane n’ubutegetsi buhari.

Muti none KARIUKI aje gute mu manyanga y’amatongo mu Burundi ? Itohoza twagize mu begereye NGENDAKUMANA na Constantin NDIKUMANA umunyakirimiro, yabaye igihe kirekire muri Kenya iyo yari yarahungiye ;
zitumenyesha ko KALIUKI yatumye NDIKUMANA kumugurira parasera mu gisagara ca Bujumbura. Kubera itama rya NGENDAKUMANA, yaciye acisha k’uwepfo parasera y’umugambwe twababwiye ko iri mu ngagara mw’ihuriro
ry’amabarabara ryitiriwe « Nations-Unies ». Uwo KARIUKI ngo yatanze amafaranga y’uburundi imiliyoni 80, mur’ayo NGENDAKUMANA akaba yariyemwo
imiliyoni 50, ayasigaye akaba ngo yabaye  amatabizi ya NDIKUMANA, ngo ni ico yise « komisiyo ». Uwujejwe amatongo yo mu gisagara we ari we Anselme WAKANA yari yahumirije kubera NGENDAKUMANA na NTISEZERANA bamufata
nk’inkundwakazi, kubera bazinanyi mu kaja ko kurya amaparasera ya Leta.
Iyo nda ndende niyo iriko bata ubwoko mu kwambika ibara umukuru w’igihugu we twoshimira k’ubu ho yifashe mu jisho agafata ingingo rugabo. Tumusavye ko
yohagurukira abo bose banyonora itunga ry’igihugu.
 

Nave mu biruhuko, ashire mu ngiro amajambo asosa adasiba kuvuga Ahandi ho bazovuga ko inderetsi y’umusuma ariwe munyonozi. Kazohava kamudererana. 

Burundi Transparence