Iperereza canke akajagari n’iterabwoba ?
Le 15 avril ‘07

Haciye igihe atari gito Abanywanyi bamwe bamwe b’Umugambwe CNDD-FDD baterekwa ihonyangwa ry’amategeko agenga uwo mugambwe ryabereye i Ngozi bagaraguzwa agati n’abapolisi bo mu biro vy’iperereza hano mu Burundi. Nkuko bivugwa, uwutwara ivyo biro vy’iperereza yoba yatanguye gukwiragiza abantu biwe abaha ibirwanisho bicira umuriro mu ntara zose z’igihugu mu ntumbero yo gutoteza abo batemera ikoraniro ryabereye i Ngozi ritisunze amategeko.

Nkuko ababikurikiraniye hagufi babivuga, i komine yose yo mu gisagara ca Bujumbura yoba yarungitswemwo abagizi ba nabi bashika cumi, aha rero tukamenyesha ko ivyo bigamije kubangamira ubuzima bw’Abagumyabanga bamwe bamwe batatamitswe ijambo ryo gushigikira ihonyangwa ry’amategeko ryabereye i Ngozi. No mu zindi Ntara zose z’igihugu ivyo bigenda vyibonekeza kuko iterabwoba rikorwa n’abo bajejwe iperereza mu Ntara riteye amakenga abanyagihugu.

Biragaragara ko harimwo ukuri muri ivyo bivugwa kuko habaye ibitero vy’abantu bakoresheje ama grenade ku muhana w’Umukenyererarugamba aba muri Komine Kamenge muri izi ndwi zibiri ziheze. Ibindi bitero nkivyo vyarateguwe muri Komine ya Kinama, ababiteguye n’abazobikora nabo bakaba bamaze kumenyekana.

Abagumyabanga babereye koko iryo zina babona ko iryo terabwoba ryerekana koko ububegito bw’abo bakozi b’iperereza bo ho gukorera abanyagihugu bose atakuraba ivyiyumviro bijanye na politike n’ibindi, bakoresha ibicanishamwo abarundi ata mvo ihari. Ivyo birerekana kandi ko abari bateguye gusambura umugambwe CNDD-FDD batigeze biyumvira ingene bazotora umuti w’ingarukambi z’iryo bomborabombora bari biyemeje.

Nta nkeka ko hihwejwe ibikorwa hirya no hino n’abakozi b’iperereza, biragaragara ko intumbero nyamukuru yabo ari iyo gutoteza abo badasangiye ivyiyumviro, cane cane mu ntumbero yo gutsimbataza akarenganyo, ububeshi n’uguhemuka biranga abihaye inzira yo gusenyura ingendo ya demokarasi.

Ntibitanganje kubona ko abatwara ivyo biro vy’iperereza bakoresha ibinyamakuru bimwe bimwe mu gutera icuka kibi no ku nzego za leta.

Ubu rero benshi baribaza ko ikurwa ry’icegera c’Umukuru w’ibiro vy’iperereza hamwe n’Umunyamabanga mwishikira wabo ryoba ritumbereye kworohereza abanyagihugu canke ko ryoba ritumbereye ibindi. Reka tubitege amaso !

CISHAHAYO Dancile