Lettres de l'Hon P. Kampayano

La lettre de l’Hon. Pascaline KAMPAYANO à ses frères et sœurs burundais. (Ikete N°63)
 Le 15 janvier 10

Ikete N°63
E-mail: iketeryanje@yahoo.fr

Murundi mwenewacu, nawe munyamahanga ukunda abarundi,

Nkundira ncuti yanje nongere ndaguhe indamutso y’urukundo, n’iyo kukwipfuriza amagara meza. Mwana wa mama, ubonye ubwicanyi buguma buba mu gihugu biturutse ku nzankano za polotiki uhanura iki ? Ehe raba muri iyo ndwi yaraye iheze mu Cankuzo hari umunywanyi w’umugambwe MSD yatewe gerenade arakomereka biteye ubwoba. Mu Ntara ya Cibitoke niko kw’uko nyene, umunywanyi w’umugambwe FNL yaragandaguwe, uwundi nawe arakomeretswa. Agahomerabunwa ni igandagurwa ry’uwitwa NIYONZIMA Sylvestre batazira Bikora wo mu Mugambwe UPD-Zigamibanga yagandaguwe ku musi wa Mungu igenekerezo rya 10 Nzero 2010. Ncuti, wibuke ko hari haherutse kugandagurwa uwitwa Ndubaraye Samsoni wo ku Muyange muri Komine Nyanza-lac, nawe nyene aturuka mu mugambwe UPD-Zigamibanga. Ntiwibagire aba Scouts barashwe muri Komine Kayogoro, bagakomereka nabi wanashaka umwe yaranacikaniye mu bitaro.

Imbere yo kumenya ico wohanura, reka jewe mbanze ndakubwire impanuro zanje, ari wewe ziraba zigufashe. Wewe ukunda abarundi abagira ivyo canke babitegura bacire umukenke gushika bagaruke mu ruhongore rw’abarundi bakunda amahoro, bakiyubara kandi bagasonera Demokarasi n’agateka ka zina muntu. Mfatiye kuri abo ba Scouts, abakoze iryo bara ntawutazi umugambwe bakorera, ariko nabo nyene batawe mu rudubi kuko ku bwabo bibajije ngo barashe abanywanyi ba UPD-Zigamibanga kuko mu mabara y’umwambaro uranga aba Scouts harimwo ayasa n’ayuwo mugambwe, nk’iritukura, iry’iatsi kibisi n’iry’umuhondo. Batawe mu rudubi kuko bene gutegura ivyo bintu barijandajandira. Aha duhanuye abakoreshwa bose kugarura ubwenge kuko ubu amatohoza arashobora gufatwa minenerwe ariko ntibizokwamaho ; bibuke aho Bangirinama Vital ari uno musi.

Ku bijanye n’urupfu rwa Ndubaraye Samsoni, Buramatari w’i Makamba yivugiye ngo yishwe kuko asanzwe ari umubandi. Ngaho ku bwiwe abona ko ari ca gihano co gupfa citwa ko cavanyweho mu Burundi cashizwe mu ngiro. Birazwi ko yazize umugambwe aturuka mwo, kandi ko ata dosiye n’imwe yari afise mu butungane. Uwo Buramatari nawe impanuro twomuha ni uko atawutwara neza atabanje kwama yisunga amategeko kandi atarukundo agirira abo atwara bose mu kwitwararika umutekano wabo ata kuvangura. Ku bijanye n’urupfu rwa NIYONZIMA Sylvestre havuzwe vyinshi, ariko, ka bunywanyi bw’umugambwe UPD-Zigamibanga, uramporeza umuryango wiwe. Umporeze kandi abazigamibanga bose, aho bari hose, uti ivyabaye bishize ahabona ibimaze imisi bishikirizwa. Uti, narumvise ivyashikirijwe na Mugwengezo Chauvineau hamwe na Nduwimana Onesime, hinge ikigandaro gihere mu ndwi imwe nzokubwira akajambo ubambwirira ariko nka Nduwimana Onesime woba uramubwira ko azohura n’igikorwa kitoroshe co kwama yisigura ku mabi nk’ayo abamwumva bitwengera. Si we murundi nta kundi yobigira.

Mu kurindira ko ikigandaro gihera ngo tuje kw’ido n’ido, wibuke ya mpanuro ya Musenyeri Ntahoturi yabwira umukuru w’igihugu igihe arahira ngo ntaze amere nk’abandi bama bashaka guhindagura amategeko kugira bigumize ku butegetsi ; ntiwobura uwo ugafashisha. Urakoze.

                                          Hon. KAMPAYANO PASCALINE